陳奕迅 杜琪峯 張艾嘉 成功的定義是…
發布時間： 2015/09/05 19:37
▲ 相片來源：Eason Chan fb
杜琪峯執導、張艾嘉編劇兼主演的《華麗上班族》，演員演出時需唱歌，邀得能演能唱的陳奕迅參演，成件事順理成章到極。
陳奕迅在片中飾演的王大偉，是大企業中高層，可惜利慾薰心，為搵快錢而不擇手段。
杜琪峯、張艾嘉、陳奕迅由寂寂無名，一步步成為所屬範疇的舉足輕重人物，自是旁人羨慕到流口水的成功人士。但在這講求急於上位的社會，3 人對何謂成功都有其睇法。
陳奕迅：
陳奕迅嘅心態同王大偉好唔同，我係想慢，陳奕迅其實係很 laid back。
我唔心急，可能因初入行時覺得好玩，一入化粧間見到很多明星，嘩，以前嘅偶像就在隔籬。
每個人成功嘅定義唔同，我嘅定義係要做好件事，從來都覺得很奇怪，點解搵到很多錢就代表成功？我對生命嘅 ambition 係要識好多朋友，我從來冇諗過要做全宇宙最叻嘅歌手。
杜琪峯：
佢（陳奕迅）未成功時一樣係咁，冇變過，佢唔會為咗達到目的，而去搞很多無謂嘢，可能因為佢對唱歌的 passion 很大，唔 care 其他事，成名與否對佢唔係最大嘅追求。
張艾嘉：
我成功嘅定義很簡單，就係將件事做好，唔係同其他嘢畫等號，唔係要好多錢、要買樓、似李嘉誠似馬雲，咁你就好似永遠都在失敗當中。如果活在同人比較中，就似永遠都達唔到目標。
陳奕迅談 突破及滿足
陳奕迅，公認係歌神，反而很虛心，在電影需與很多非歌手的藝人如湯唯合唱，懂得欣賞別人的好。
對藝術的提升，Eason 從來在意。
對音樂嘅節奏感，很多時係與生俱來，甚至再奇幻啲講，係上一世甚至上幾世帶落嚟。
天份吖嘛，係天，所以有啲人練極都 get 唔到，而湯唯係有天份。很多叻嘅演員，唱歌都得，可惜拍攝時未有機會聽發哥唱，但懷疑佢唱得好，否則首《舊情人》唔會 hit 咁耐。
佢係用唔同當時主流歌手嘅方法演繹，係另一種嘢。所以要拉闊視野，任何藝術工作者都有教育觀眾嘅責任，觀眾細味藝術嘅角度要進步，演唱會有爆破有 effect 係重要，但唔一定要有，大家唔應該只睇呢啲，可以好多角度去欣賞。
食老本，比試新嘢安全。（好似係）但已上晒神枱的 Eason 唔怕死，選歌仍試新嘢、演唱會亦重視主題。
我哋常有好多假設，之前去麗水開演唱會，三四綫城市，但個 show 嘅主題隱喻佢哋明。唱《不如承諾來的簡單》，係一首很撕裂很糾結嘅歌，唱完，全場靜晒，我反而很開心，因為咁先係正常，即佢哋有畀呢樣嘢嚇呆，我覺得中咗，鍾意呢個反應。
今天的 Eason 唱歌，很易就有歡呼聲，但於 2000 年，他在商場首次公開唱《K 歌之王》時，台下成班師奶零反應。
愈見你哋冇反應，我就愈畀力，但始終都係冇，真係想喊，但亦係最珍貴。
首歌正正就係話：『給你用力作二十首不捨不棄，還附送你愛得過火，給你賣力唱二十首真心真意，米高峰都因我動容』。
反而後來首歌 hit 咗，音樂一起、未唱，大家已經叫，所以那次係只此一次，做藝術就係有呢種無奈，反而要珍惜。
有人在演藝圈的目標是爭名逐利，估計 Eason 未至於完全視名利如浮雲，但相信是否被稱為歌神並非他最在乎，創作及演出的突破及滿足，才是他最追求的境界。
杜琪峯談 務實與虛妄
片中人人爭上位，王大偉更因利慾薰心，虧空公款炒股票，結果聰明反被聰明誤，杜 Sir 再拍高速發展的商業社會之奪命金故事。
今日大家都想扶搖直上，希望在社會、在行業爭到領導位置，但在過程中，會唔小心去走捷徑，或做違背道德原則嘅事。這現象在整個世界都出現，人開始唔願意等，想盡快去到目的地。
近年大部分年輕人都係咁，一係就 hea 到電車男咁，日日躲在屋企，瞓到黃朝白晏、一起身就拎住部電腦，夜一夜都唔瞓，又係拎住部電腦，呢啲唔係人嘅生活，直頭係條蟲。
70 年代，大家起身趕住做嘢，爭取在責任上嘅事要做到最好。可能在富裕咗嘅社會就會出現咁嘅現象。
張艾嘉談 生活與生存
《華麗上班族》電影版與舞台版的劇情約有一半不同，儘管如此，身為兩個版本編劇的張姐，要講的核心思想始終沒變。
點寫呢個劇本都諗咗好耐，原來改自己劇本都好難，後來覺得改編只要保持原意就得，咁就直情放低，重新嚟過。故事最終意思都係講後生仔最初出嚟打工，都係抱住好多理想，但到某個時候，仲可唔可以堅持呢？
我覺得做創作嘅人，係要夠膽去改變，唔可以成日重複自己，就算重複都要用唔同嘅方式。挑戰自己係最好玩，否則人生很 boring，一個人原地踏步，都係一種退步，我唔想。
我唔係唔鍾意商業片，其實我鍾意，因為我都係從商業電影長大，很了解、唔排斥。同時我關心觀眾，只不過而家觀眾唔關心自己，係睇熱鬧多過睇電影。
（節錄）
全文刊於《經濟日報》（收費閱讀）
